Si gen yon bagay ki pi enpòtan fò ou fè nan lavi a se ou konsève Delivrans Bondye te ba ou. Li se sa ki ba garanti ou viv lavi ou pou toutan. Sepandan, malerezman, sa ki te pase avèk Pwofèt Azaf e sa ki te pase avèk Mat, sè Mari ak Laza ap pase nan lavi anpil moun ki pèdi tan yo ap gade lavi lòt moun ki se yon estrateji dyab la pou mete dout nan tèt moun ki fidèl kanta lavi yo pa rapò ak lavi moun ki pa fidèl epi yo bliye ke yo pa gen Jezi. Konsa, dyab la fè ou bliye ke ou gen pi gwo richès andan tèt ou pou ou gade sa kap peri ki nan lavi lòt moun ke yo ni menm konnen Senyè a:

Wi, Bondye bon pou pèp Izrayèl la, pou moun ki pa gen move bagay sou konsyans yo. Sòm 73:1

Li rekonèt jan Bondye bon, prensipalman paske li te gen mizerikòd pou ba li chans pou li pa tonbe:

 Men, pye m’ glise, li manke chape, ti kras mwen tonbe, paske mwen te anvye sò moun k’ap fè grandizè yo lè mwen te wè jan mechan yo alèz. Sòm 73:2-3

Poukisa li preske glise tonbe? Paske olye li fikse nan lavi li te genyen ak Senyè a, li pèdi tan li nan gade lavi lòt moun yo…

Yo pa gen pwoblèm, yo pa malad, yo byen gra. Yo pa soufri sa lòt moun ap soufri. Yo pa gen pwoblèm lòt yo genyen. Yo pran pòz pa kanmarad pesonn, y’ap plede bat moun. Kè yo plen mechanste. Yo plen move plan nan tèt yo. Y’ap pase lòt moun nan rizib, y’ap pale move pawòl. Yo awogan, y’ap plede mache di jan y’ap kraponnen moun. Yo pale Bondye ki anwo nan syèl la mal, y’ap bay tout lòt moun lòd avèk awogans. Sòm 73:4-9

Li te konnen tout detay sou moun ki mechan, poukisa? Paske li kite sa Bondye te ba l la a kote pou fikse je sou lavi lòt moun yo. Lè nou fè sa, an jeneral, nou pa sonje bonte Bondye, jan li pran swen nou, tout sa li te fè pou nou. Jezi te wè menm bagay nan lavi Mat epi li te anseye li sa ki pi enpòtan:

Mat menm t’ap fatige kò l’ ak tout travay ki te pou fèt nan kay la. Lè sa a, li vini, li di: Mèt, sa pa fè ou anyen pou ou wè sè m’ lan kite m’ ap fè tout travay la pou kont mwen? Manyè di l’ ede m’ non. Jezi reponn li: Mat, Mat. W’ap trakase tèt ou, w’ap bat kò ou pou yon bann bagay. Men, se yon sèl bagay ki nesesè. Se li Mari chwazi, yo p’ap janm wete l’ nan men li. Lik 10:40-42

Gade videyo ki anlè a pou ou antre pi fon nan sijè a…